کچه‌ گه‌ریلایه‌ک له‌ كۆبانێ شه‌هید بوو

شەرڤانێکی کچ بە نازناوی (داستانێ قەندیل) لە کوبانێ شەهیدبوو، ئەو شەڕڤانە خەڵكی گوندەكانی بناری قەندیلە و دانیشتووی شارۆچكەی چوارقوڕنەیه‌. ئه‌م شه‌هیده‌ شه‌ڕڤانه‌ له‌ بنه‌ڕه‌تدا ناوی (بەیان محەمەد)ە و رۆژی 20ی تشرینی یه‌كه‌می 2014، له‌ هەڵمەتی پاككردنەوەی خۆرئاوای شاری كۆبانێ‌ لە داعش و پرۆسه‌ی راماڵینی ئه‌و تیرۆرستانه‌، شەهیدبووە. وه‌ك هه‌ڵوێستی هه‌میشه‌یی خۆشی، قوبادی جه‌لیزاده‌، شاعیری گه‌وره‌ی كورد كه‌ هه‌میشه‌ به‌ هه‌ڵوێسته‌ نیشتمانییه‌كانی ناسراوه‌، شیعرێكی به‌ناوی (ژنه‌ گه‌ریلا) بۆ ئه‌م كچه‌ شه‌ڕڤانه‌ی قه‌ندیل و سه‌رجه‌م کچه‌ شه‌رڤانه‌کانی دیکه‌ نووسیووه‌. ژنه‌ گه‌ریلا قوبادی جه‌لیزاده‌ چوومه‌ به‌ر ده‌م دوژمنه‌که‌م ، دامه‌ ده‌ستی کۆتری ئاشتی . که‌چی وه‌ک پیشه‌ی هه‌میشه‌ی ، زینده‌ به‌چاڵی کرد ناشتی . چڵه‌ زه‌یتوونێکی سه‌وزم ، دا له‌ یاخه‌ی داگیرکه‌رم . که‌چی به‌رووما هه‌ڵشاخا، سوپای مه‌رگی کرده‌ سه‌رم . به‌ قه‌ندیلێ سه‌رده‌که‌وم ، ناچار ده‌بم به‌ پێشمه‌رگه‌ . به‌رگی گه‌ریلا ده‌پۆشم ، خوایه‌ چه‌ند جوانه‌ ئه‌و به‌رگه‌ . به‌جێ دێڵم شه‌قامی شار به‌ر جامخانه‌ی زێڕینگه‌ران . وه‌ک پڵنگی ئازاو چه‌له‌نگ ، خۆم توند ده‌که‌م له‌ سه‌نگه‌ران . ئیدی ره‌نگ ناکه‌م نینۆکم ، بۆن وسووراو ناده‌م له‌ خۆم . له‌ شه‌وی ئه‌نگوسته‌ چاوا، هه‌ر ده‌ په‌نجه‌م ده‌که‌م به‌ مۆم . قاچم ده‌که‌م به‌ ئه‌سپه‌شێ ، ئه‌سپی عه‌گیدی( با) شکێن . پشت ده‌که‌مه‌ شه‌مه‌نده‌فه‌ر ، ناچمه‌وه‌ سه‌ر پشتی ماشێن . ئاسمان به‌ خۆما داده‌ده‌م ، ناچمه‌ بن لێف و به‌تانی . ئاوی یه‌خچاڵ ناخۆمه‌وه‌ ، بین ده‌نێم به‌ جۆگه‌و کانی . کوانێ بۆنی گوڵی نایلۆن ، گوڵی کێوی ده‌که‌م چه‌پک . وه‌ک که‌ڵه‌ کێوی رێده‌که‌م ، له‌م که‌پکه‌وه‌ بۆ ئه‌و که‌پک . فرێ ده‌ده‌م پاژنه‌ بڵند ، پێ ده‌ده‌مه‌ ئه‌دیداسێ . سه‌ر له‌ سه‌رین ده‌ترازێنم ، ده‌با ئیتر به‌رد بناسێ . جانتام پڕ ده‌که‌م له‌ فیشه‌ک ، له‌ جێی ماکیاج و ماسکاره‌ . رووباری خوێنم ده‌به‌خشم ، به‌ گوڵاله‌ی ئه‌م به‌هاره‌